الساعه 7 الصبح والواحد صاحى بدرى – وده اساسا نادرا لما بيحصل - الشمس لسه بخيرها كده والحياه عنب ..... قلت لنفسى ياواد فرصه البيت فاضى وانا لوحدى يبقى لازم نستغل الموقف ده بقى ..... كوبايه شاى بحليب وساندويتشين ودخلت الاوضه اقضى الوقت ده انا وكتاب الجراحه اللعين ..... شغلت البلاى ليست
وقلت ابدأ بقى وبسم الله .... والاقى صوت عمك صلاح جاهين بيقول
خـوض معركتهـا زى جـدك مـا خاض
صــالب وقـالب شـفتك بامتعـاض
هـى كـده . . ما تنولش منهـا الأمـل
غير بعـد صـد ورد ووجـاع مخـاض
عـجبى !!
ولقيتها بصراحه فرصه الواحد يتلكك وامارس هوايتى المعتاده فى السرحان – وما احلى السرحان خصوصا وانت بتذاكر – وافكر ف كلام عمنا صلاح شويه .... وراح طالع عمنا بتاع الجنب الشمال وسألنى سؤال ...
= وليه وجع القلب اساسا وبعد ده كله هيحصل ايه يعنى ما انت عارف ديتها يا ابنى الدنيا دى مش لينا ... وراح ممصمص شفايفه وقايلى .... تعرف لو كانو اخترعوا أله الزمن بتاعه عمنا هربرت جورج ويلز اللى قريتلى عنها زمان دى كان الواحد يرجع لورا كتييييييييييير .... يروح يعيش فى زمن تانى .... الاغريق مثلا ياااااااااه ده كان الواحد عاش يومين حلوين ... ناس كده دماغ فلاسفه بقى وحياه حلوة نضيفه كلها خير
وطبعا رغم انى مش موافق على الكلام اللى هوا بيقوله بس لقيت نفسى بقف لثوانى مع نفسى .... اصل الكلام ده سمعته كتير قبل كده .... ياما شباب قالوة ضمن احلام الهروب من الحياه اللى احنا عايشينها بكل ضغوطها ومشاكلها سواء فى دردشات ع القهاوى او النت او حتى فى الالعاب الاكثر شعبيه واللى بتعتمد على عامل خلق العالم الموازى المستمد من الازمنه المختلفه ..... وقبل ما ارد عليه الرد اللى انا عارف انه هوا نفسه وكتير جدا شايفينه مجرد كلام فى الهوا لقيت اخونا التانى بتاع اليمين بيسبقنى ويبدا الخناق اللى داير معاه جوايا من زمان
== اله زمن ايه بس واغريق مين .... بطل هروب وسيب الزمن فى حاله العيب مش فيه العيب فى البنى ادمين
ولقييت نفسى بتقمص دور حكم كروى- من بتوع اوربا دول اللى يخوفوا مش من بتوع لجنه الحكام - وبصفر قبل ما يمسكو فى بعض وانا مش ناقص
جايز يكون كلامه فيه جانب من الصواب بس انا برضو مش موافق .... ولاول مره فى التاريخ اتفقوا عليا واحد عوجلى بقه والتنى رسملى تكشيره غريبه على وشه بس على مين
انا فعلا مش موافق معاهم هما الاتنين ولو كانت اله الزمن موجوده كنت هختار انى افضل فى زمانى ده واعيشه رغم كل العيوب اللى فيه ..... انا عندى فى الموضوع ده رأى ومتمسك جدا بيه ...... المشكله عمرها ماكانت زمن ولا ازمه اقتصاديه وبطاله وعنوسه والجنيه اللى غطس ما قبش ولا توريث ولا فى بوش واوباما ولا حتى منتخبنا اللى مش عارف يوصل كاس العالم ولا حلها اننا نسيب زمنا ونهرب لان كل زمن ليه مميزات وعيوبه وليه ناسه يعنى بتوع الاغريق ما كانوش عايشينها فى سعاده وهنا ع طول ولا الناس فى اى زمن تانى على مدار التاريخ البشرى كانت كل ايامهم هنا وسعاده واحنا بس الجيل المنكوب اللى جه فى زمن عجيب وده برضو مش معنها ان العيب فى البنى ادم بشكل مطلق لا ..... ربنا خلق كل واحد فينا لهدف معين فى الحياه ... دور بطوله مكتوب لنا اننا نمثله ..... احنا بقى بنفضل نبص حوالينا ونركزفى تفاصيل ,نشغل بالنا بحاجات, وندور على اجابات لاسئله مش مفيده ولا ليها اى لازمه ..... ليه نعقد حياتنا ونضيع على نفسنا فرصه اننا ناخد بالنا من الرسايل اللى ربنا بيبعتها من السما ..... مفتاح اللغز مدفون جوانا فى سرداب عميق ..... رحله لازم ناخد القرار بأننا نبدأها واكيد هنشوف حاجات كتير فى الرحله دى ,هنتعلم حاجات , وهنقدر نوصل بحياتنا لصيغه تخلينا نعيش احسن كتير وسط كل العوء اللى داير حوالينا فى الدنيا ده ...... وقبل ما حد فيهم يرد عليا وبمنتهى الديكتاتوريه طردتهم منى وحطيت دماغى فى وسط كتاب الجراحه يمكن اخلصه وصوت على الحجار مع عمنا صلاح جاهين بيقولى
أنا اللى بالأمــر المحــال اغتـوى
شـفت القمـر نطـيت لفوق فى الهوا
طـلته مـا طـلتوش إيه انـا يهمنـى
وليـه … ما دام بالنشـوة قلبـى ارتوى
تقربيا -ان ماكنش الزهايمر شد حيله معايا- دى اول مرة اقرا ليك حاجه كده،، لايت شوية وحوار بالعامية
ردحذفوعملته حلو اووى وكمان جوها فكرة ومضمون صغيته بسلاسة
والفكرة انا متفقة معاك فيها ،، دايما بقول احنا اختلقنا لسبب بس نعرفه وكمان وجدنا فى التوقيت ده لسبب واحتمال كبيررر لو فى وقت تانى ماكنش هنكمل
لكن برضه لا يمنع اشتياق لعصور اخرى كحنين لبعض الاشياء اللى فقدنها هنا فبتغطى على سلبيات العصر الاخر
واختم رغى:)
باكتر جملة عجبتنى ...مفتاح اللغز موجود جوانا فى سرداب عميق"
بوسى